Зөвлөлтийн номер нэг тагнуулч Ольга Чехова нь 1887 онд төржээ. Тэрбээр Оросын алдарт зохиолч Чехов Антон Павловичийн үеэл дүүтэй гэрлэн 1920-иод оны дундуур Герман улсад очиж тэндээ байнга оршин суух эрх авч ажиллаж амьдрах болсон байна. Удалгүй тэрээр Герман улсын урлагийн ертөнцөд нэр хүндтэй болоод зогсохгүй Гитлерийн хайртай жүжигчин, эхнэр Ева Брауны дотно найз болж чадсан аж. Түүний найзууд дунд Гиммлер, Геббельс, Геринг нарын эхнэрүүд мөн адил байсан байна. Бүгд л түүний авьяас, гоо сайхан, хурц ухааныг бахдан биширдэг байжээ. Ольга нь маш үзэсгэлэнтэй, Герман, Франц, Итали хэлээр чөлөөтэй ярьдаг, жүжигчин болохыг мөрөөддөг бүсгүй байжээ. 17 настай байхдаа Москва руу өөрийн авга эгч Ольга Леонардовна Книппер-Чехова дээр очиж амьдрах болсон байна. 1914 онд Михаил Владимир Чеховтай нууцаар гэрлэж Ада гэх охинтой болжээ. 1921 онд охин Адагийн хамт Герман улсад очиж амьдрах болсон байна. Тэрээр ЗХУ-аас явахаасаа өмнө хэд хэдэн кинонд тоглож амжсан байна. Германд түүний гоо сайхныг анзаарсан кино найруулагч нар өөрсдийн уран бүтээлд урьж тоглуулснаар түүний алдар нэр өсч эхэлжээ. 1930-аад онд Ольга Германы дэлгэцийн бүтээлийн од болж Герман улсын иргэн болсон байна. 1936 онд Гитлер Ольга Чеховт тухайн үеийн германы дээд шагнал болох "Гуравдугаар рейхын гавьяат жүжигчин" цол хэргэмээр шагнасан байна.

Ольга Чехова нь Гитлерийн хайртай жүжигчин дотны найз байсан тул улс төр, цэрэг арми, зохион бүтээгч, үйлдвэр худалдааны эзэд Гитлертэй уулзахаасаа өмнө Ольга Чеховатай уулзаж, Гитлерт таалагдахын тулд юу хэлэх, яаж ярих талаар зөвлөгөө авдаг байж. Уулзалтын ярианы сэдэв янз бүр байсан байна, "Газар доорх зэвсгийн үйлдвэр", "Пүүжин харвах нууц талбай", "шинэ төрлийн зэвсэг" гэх мэт. Энэ бүх мэдээллийг жүжигчин бүсгүй өөрийн жижигхэн алтан шар өнгийн дэвтэр дээр тэмдэглэн үлдээдэг байж. Тэр дэвтэр дээр бичигдсэн мэдээллүүдийг ганц Гитлер мэдээд зогсохгүй хэсэг хугацааны дараа Сталин ч мэдэж авдаг байж. Ольга Чеховагийн дамжуулж байсан мэдээ мэдээллүүд нь маш чухал үнэ цэнэтэй байсан ба ялалт байгуулахад өндөр хувь нэмэр оруулж байжээ. Тагнуулч бүсгүй илгээсэн мэдээллийн тусламжтай Курск руу довтлох цаг хугацаа, цэрэг техникийн тоо, нууц цэргийн зэвсгийн үйлдвэрүүдийн байршил, атомын бөмбөг хийх туршилт зэрэг Гуравдугаар Рейх-ийн нууц далд үйл ажиллагаанууд ил болж таслан сэргийлэх арга хэмжээ авч чадсан байна. Эдгээр мэдээллүүд маш нууц байсан тул энэ мэдээллийг зөвхөн Германы дээдсийн хүрээлэлд нэвтэрсэн хүн л олох боломжтой байв. Тэр хүн нь Ольга Константиновна Чехова байв. Тэрээр хамгийн боломжгүй нууц мэдээллийг Гитлера болон Гиммлераас авч шууд дамжуулдаг байсан Зөвлөлтийн хамгийн үнэ цэнэтэй тагнуулч байжээ. Мөн Сталиний маш нууц төлөвлөгөө болох Гитлерийг устгах ажиллагаанд Ольга Чеховаг татан оролцуулахаар төлөвлөж байсан боловч сүүлийн мөчид Сталин дээрх нууц ажиллагааг зогсоосон байдаг. Германы тагнуулчид хаанаас мэдээлэл алдагдаад байгааг удаан хугацаанд олж тогтоож чадаагүй боловч удалгүй жүжигчин бүсгүйг сэжиглэж эхэлсэн байна. Нэг удаа бүсгүйг байцаахаар Гиммлер өөрийн биеэр гэрт нь очсон байна. Гиммлер өөрийг нь сэжиглэж мөн гэрт нь ирэх гэж буй талаар урьдчилан мэдсэн бүсгүй, Гиммлерийг ирэх үед гэртээ Гитлерийг урьж нүүр тулсан ярилцлагаас мултарч, сэжиглэлийн хүрээллээс мултарч чаджээ. Жүжигчин бүсгүйг дайн дуусах үеэр Гиммлерийн хамсаатныг нуун дарагдуулсан гэх үндэслэлээр "СМЕРШ" /ЗХУ-ын сөрөх тагнуулийн алба/-ийн төлөөлөгч нар баривчилсан байна. Эхний байцаалт дээр Ольга Чехова нь өөрийн тагнуулчийн нууц нэрээ хэлсэн байна. Түүний нууц нэр "Актриса" буюу жүжигчин. Түүний хэн болохыг нь мэдсэний дараа тусгай онгоцоор ЗХУ руу нууцаар авчран, ЗХУ-ын сөрөх тагнуулын газрын дарга, улсын аюулгүй байдлын комиссар Виктору Абакумовын өрөөнд авчирсан байна. Тэд хэдэн цаг ярилцсаны эцэст Ольгаг шорон руу биш харин  эсрэгээрээ нууц байр руу аваачиж амраасан байна.

Удалгүй Сталин, Берия нар түүнтэй уулзаж, Сталин өөрийн биеэр төрийн өндөр шагнал гардуулж байжээ. Түүний энэ аялал маш нууц байсан тул тагнуулч бүсгүй ЗХУ-д амьдардаг байсан өөрийн төрсөн охинтой ч уулзаж чадаагүй аж. Удалгүй Ольгаг тусгай онгоцоор буцааж Берлинд хүргэж өгсөн байна. Энэ нь Ольга нь жирийн нэг жүжигчин биш, харин Зөвлөлтийн супер тагнуулч байсныг гэрчилж байгаа юм. Жүжигчин бүсгүйг Герман руу буцаасан ба бүх насаар нь эдэлж хэрэглэх хөрөнгө мөнгөөр шагнан урамшуулжээ. Дайны дараа бүсгүй өөрийн амьдрал уран бүтээлийн талаар ном бичсэн, гэхдээ тэрээр номондоо өөрийн тагнуулын ажлын талаар нэг ч үг дурьдаагүй байна. Түүнийг нас барсны дараа түүний эд зүйлээс олдсон жижигхэн тэмдэглэлийн дэвтэр түүнийг ЗХУ-ын сөрөх тагнуулийн алба болох "СМЕРШ"-ийн нууц ажилтан байсныг гэрчилжээ. Энэ бүхэн яаж эхлэв? 1923 оны зун Ольга дээр алдарт зохиолч, сэтгүүлч Лариса Рейснер ирж уулзжээ. Үнэндээ энэ жирийн нэг уулзалт байсангүй, түүнийг Ольга руу тухай үеийн Бүх Оросын Онцгой Комиссын дарга, домогт чекист Феликс Дзержинский явуулсан байж. Ийнхүү Зөвлөлтийн тагнуулын алба Ольгаг анх өөрийн эгнээндээ элсүүлжээ. Тагнуулын байгууллагын нууц мэдээллийн санд хадгалагдах бүх тагнуулчдын хувийн хэрэгт Ольгагийн овог нэртэй хувийн хэрэг байсангүй. Түүн шиг өндөр зэрэглэлийн маш нууц, гүн халхавч доор ажилладаг тагнуулуудад хувийн хэрэг нээдэггүй байж, түүний оршин байдаг талаар Зөвлөлт оронд Сталин болон түүний ойрын хүрээллийн хэдэн тооны хүн л мэднэ. 

1945 оны сүүлээр Ольга нь Берлинд өөрийн уран бүтээлээ дахин эхлүүлсэн байна. 1955 онд Ольга Чеховой гэх өөрийн гоо сайхны фирмийг нээж Европт хамгийн нэр хүндтэй гоо сайхны фирм болж чадсан. Анхны нөхөр Михаил Чеховаас салаад хоёр ч удаа амьдрал зохиосон боловч бүтээгүй. Австри Венгерийн армийн офицер Фридрихом Яроши гэх хүнтэй гэрлээд удалгүй салсан, дараа нь Бельгийн тэрбумтан Марсел Робинсон гэгчтэй гэрлэсэн боловч мөн  салсан байна. Түүний цорын ганц хайр нь түүний охин Ада. Гэвч 1966 он автомашины ослоор охин нь нас барснаас хойш Ольга Константиновна гашуудлаасаа салж чадаагүй байна. Тэрээр 1980 онд 83 насандаа таалал төгсжээ. Алдарт жүжигчин, супер тагнуулч бүсгүй нийт 140-өөд кинонд тоглосон байна.