ЭРГЭЛЗЭЭ-4

/Хатуу хөл хорионы үеийн хошин егөөдөл/

Таминь ээ! Сүүлийн үед шуурхай мэдээ үзэхээр Улсын Онцгой маниусыг эргэлзүүлээд байдаг боллоо. Хатуу хөл хорио тогтоосон ч юм шиг. Хүчит шонхор захыг нь харахаар хөл хориогоо цуцалсан ч юм шиг. Автобусанд чихэлдэхээр корона тусахгүй ч юм шиг, Машинаараа явахаар корона тусах гээд байгаа ч шиг юм яриад байхын. Коронавирус нь аймшигтай тахал ч юм шиг, нэг муу томуу ч юм шиг. Хөл хориог сунгасан нь дээр ч юм шиг дэмий ч юм шиг. Оношилгооны аппарат нь ориг ч юм шиг хулхи ч юм шиг юм ярихын. “Хархан нүдэн” тоглолтоос корона вирус “алдцан” ч юм шиг, хойд хөршөөс төмөр замаар ай-ль эрт “ацарцан” ч юм шиг. Хэн мэдэх үү? Хотын дарга нь ядраад байгаа ч юм шиг, нэгэн бодлын ялархаад байгаа ч юм шиг. Энхсаран сувилал нь Сарангэрэл сайдынх ч юм шиг, Содбаатар даргынх ч юм шиг. Ёстой чөтгөр бүү мэд ээ! Шуурхай мэдээ үзэхээр дарга нар нь ард түмнээ загнаад байгаа ч юм шиг, зөвлөөд байгаа ч юм шиг. Коронавирус сарын өмнө илэрсэн ч юм шиг, сошиол комент уншихаар жилийн өмнө тарцан нь ч юм шиг. Ерөнхий сайдын 23 мэдэгдэл нь ядарсан ард түмнээ тэтгэх гээд байгаа ч юм шиг доромжлоод байгаа ч юм шиг. Монгол банк нь бүх төрлийн зээлийг царцаасан ч юм шиг, царцаагаагүй ч юм шиг.

Хөл хорионд хөлбөрөөд хэвтэх сайхан ч юм шиг хөргөгчөө онгойлгохоор муухай ч юм шиг. Нямхүү эмчийн яриагаар коронавирус нь ярьдаг ч байгаа ч юм шиг, зомби ч юм шиг толгой эргүүлээд хаячихын. Корона туссан хүүхний яриаг сонсохоор буудалд сэгсийтлээ хавьтсан ч юм шиг хавьталд ороогүй ч юм шиг. Ковидын эсрэг вакцин гарсан ч юм шиг нэг бол гараагүй ч юм шиг. Хүүхдүүдээ харахаар теле хичээлээ давтаад ч байгаа ч юм шиг, гар утсаараа өдөржин папжий-тоглоод байгаа ч юм шиг. Майдар бурханы хөшөө хэрэгтэй ч юм шиг маскны үйлдвэр барьсан нь хамаагүй дээр ч юм шиг бодогдохын. Эхлээд эрүүл мэндээ аврах ёстой ч юм шиг, эдийн засгаа аврах ёстой байсан ч юм шиг. Хатуу хөл хорионы үеэр монголчууд цухалдаад байгаа ч юм шиг, хар ус ууж чадахгүйдээ бухимдаад байгаа юм уу. Ингэж бодохоор аймаар тахал улсыг маань мөхөөх ч юм шиг, Харин эсрэгээрээ архины хэрэглээ монголыг сөнөөхөд амархан ч юм шиг санагдаад байх боллоо!