Өнөөдөр болсон ЭМЯ-ны мэдээллийн үеэр ХӨСҮТ-ийн халдвар авсан сувилагчтай хамт байсан таван эмчийн нэгээс коронавирусийн халдвар илэрчээ. Гэхдээ дээрх эмч сувилагч нар тусгаарлалтын хугацаанд байсан учир дотооддоо алдаагүй хэмээн ЭМЯ-наас онцоллоо. Ингэснээр Монгол Улсад Covid-19 халдварын нийт батлагдсан тохиолдол 374 болжээ. Үүнээс 317 нь эдгэрсэн бол 54 хүн Халдварт өвчин судлалын үндэсний төв (ХӨСҮТ)-д эмчлүүлж байна. 

ЭМЯ Covid-19 цар тахлын тархалтын талаар өдөр бүр мэдээлэл хийдэг байсан бол одоо зөвхөн Даваа, Лхагва, Баасан гаригт 11.00 цагаас мэдээлэл хийдэг болсон юм. Дашрамд дурдахад, Монгол Улсад Covid-19 халдвар бүртгэгдсэн цагаас хойш өнөөдрийг хүртэл эрүүл мэндийн салбарынхан 94593  хүнд шинжилгээ хийсэн бол нийт 32422  хүн тусгаарлагджээ.