МАН-ын Хяналтын ерөнхий хороо өнөөдөр хуралдаж, ЖДҮХС-гаас  албан тушаалаа ашигласан гэм буруутай гэж үзсэн нэр бүхий намын гишүүдээ гишүүнчлэлээсээ хасчээ. Дээрх шийдвэрийг  МАН-ын Хяналтын ерөнхий хорооны дарга Б.Баярбаатар мэдээллээ. Тэрээр "МАН-ын дүрэмд орсон сахилга, хариуцлага, ёс зүйтэй холбоотой нэмэлт өөрчлөлтийг хэрэгжүүлэх талаар хэлэлцлээ. Намын гишүүн нь цаг хугацаанаас үл хамаарч авлига албан тушаалын гэмт хэрэгт буруутай нь шүүхээр тогтоогдож, ял шийтгэл эдэлж байсан бол намын сонгуульт албан тушаалт нэр дэвшихгүй, улс төрийн дэмжлэг авахгүй, улс төрийн бүх сонгуульд нэр дэвших боломжгүй болгосон. МАН-аас улс төрийн өндөр албан тушаалд нэр дэвшин сонгогдож ажиллаж байх хугацаандаа авлига албан тушаалын гэмт хэрэг үйлдэж, яллагдагчаар татагдсан тохиолдолд өөрийн хүсэлтээр түдгэлзэх хүсэлтээ ирүүлдэг. Ингээгүй тохиолдолд Хяналтын ерөнхий хороо хуралдаж, намын гишүүнээс нь түдгэлзүүлэх дүрэмтэй. Энэхүү дүрмийн нэмэлт өөрчлөлтийг ес хоногийн өмнө Улсын дээд шүүх бүртгэгдсэн. Намаас гарсан тухай асуудлын талаар эхэлж хэлэлцлээ. Албан тушаалаа ашиглаж, бусдад давуу байдал олгосон зэрэг зүйлчлэлээр ял шийтгэл сонсоод, энэ хугацаа нь дуусаагүй зарим гишүүнийг намаас гарсанд тооцсон. УИХ-ын гишүүн Г.Солтан, Б.Ундармаа, Д.Дамба-Очир, Б.Батзориг, Д.Хаянхярваа нарыг МАН-ын гишүүнчлэлээс гарсанд тооцлоо" гэв.  Эдгээр хүмүүсийг харахад ганцхан Б.Батзоригоос бусад нь УИХ-ын гишүүн асан. Товчхондоо, тэднийг өнөөдөр намаас хасч байгаа нь шийтгэл биш гэж иргэд үзэж байна.