Украины Харьков хотоос манай улсын 19 иргэн, тэдний гэр бүлийн дөрөв, нийт 23 иргэн Харьков-Львов чиглэлийн галт тэрэгт амжиж суусан байна. Харьков хотоос Львов хот хүртэл 1,018 км, Львовоос Украин-Польшийн хил хүртэл 70 гаруй км, нийт 1,100 орчим км амаргүй замыг туулаад аюулгүй газарт хүрэх аж.  Ингэснээр Орос-Украины дайны бүсэд үлдсэн байсан манай улсын иргэд бүгд эсэн мэнд гараад байгаа тухай  оюутнууд ар гэрийнхэндээ мэдэгджээ. Тэднийг Харьков хотоос гарсны дараа төв талбай болон хотын захиргааны байрыг нь  бөмбөгдсөн байна. Энэхүү бөмбөгдөлтөөс болж, энгийн 10 гаруй иргэн  амь насаа алдсан аж. 

Украин-Польшийн хилээр манай  оюутнууд нэвтэрсэн даруйд Монгол Улсаас БНПУ-д суугаа Элчин сайдын яам, Унгар Улсад суугаа Элчин сайдын яам, БНЧУ-д суугаа Элчин сайдын яамны ажилтнууд болон ГХЯ-ны төвийн томилолттой ажилтнууд тус тус тосон авч, Варшав хот руу хүргэхээр бэлэн байдалтай ажиллаж байна.  Иргэдээс хоёрдугаар сарын 27-ны өдөр гурван иргэн эх орондоо ирсэн бол 15 иргэн гуравдугаар сарын 3-ны өдөр Истанбул-Улаанбаатар чиглэлийн нислэгээр эх орондоо ирнэ.