Монголд ардчиллыг авчрахад Монголын Ардчилсан холбоо түүхэн үүргээ гүйцэтгэсэн ч өнөөдөр харамсалтай нь Х.Баттулгын халаасны байгууллага болсон. Түүхт 30 жилийн хугацаандаа цөөнгүй даргын нүүр үзсэн ч өнөөдрийнх шиг шороотой хутгаж байсангүй. Иймд үзэл бодол, үнэт зарчмаа хамгаалахыг хүссэн үе үеийн МоАХ-ны гишүүд маргааш  холбооныхоо цаашдын хөгжил дэвшил Х.Баттулгатай холбогдож буй өмч хөрөнгийн маргааны талаар хэлэлцэхээр болжээ. 

Х.Баттулга нь МоАХ-г удирдсан  сүүлийн 8 жилийн турш Ардчилсан холбооны хурлыг нэг ч удаа хийгээгүй гэнэ. Түүгээр ч зогсохгүй хувийн компанид  газар байрыг нь барьцаалан Хөгжлийн банкнаас зээл авснаар, өнөөдөр МоАХ орох оронгүй болж байгаа аж.  МоАХ-ны газартай холбоотой асуудалд ажлын хэсэг байгуулаад ажиллаж байгаа юм байна. Х.Баттулга МоАХ-ны нэр дээр Хан-Уул дүүрэгт газар авч, анхдагч гишүүдэд орон сууц барих хүсэлтээ хотын дарга өгсөн аж. Гэтэл өгсөн газар дээр нь барьсан барилгаа анхдагч гишүүддээ бус арилжааны журмаар бусдад худалдаж, асар их мөнгө олсон нь тодорхой болсон байна. 

Иймд энэ асуудлыг хурлаараа хэлэлцэж, Х.Баттулгыг МоАХ-наас хөөх асуудлыг ч ярилцахаар болжээ. Гэхдээ зөвхөн хөөх бус хариуцлагыг нь үүрүүлж,  хувийн зорилгодоо ашигласан мөнгийг эргүүлэн төлүүлж, газар байраа авахыг шаардах юм байна.  Мөн түүнийг МоАХ-ны дарга атлаа МАН-ын даргын зөвлөх хийж яваад ардчиллын партизанууд дургүйцэж байгаа юм.  Анхдагч гишүүдийг энэхүү тавьсан саналаас айсан Х.Баттулга хуралдаа биеэр ирж оролцохгүй, цахимаар оролцох хүсэлтээ илэрхийлсэн байна.  Юутай ч маргааш болох МоАХ-ны хурал ширүүхэн болох шинжтэй.